Oprichting Nachtegale 1959

Frits Smeets kump ter ore det de inkele jaore teveure opgerichte Tuinhagedisse oet Leeve haor pekskes verkaupe. Dit brink um op ut idee om in Azerao auch ein vastelaovesvereniging op te richte.
Frits Smeets, Harrie Diels en Wim Diels troffe zich sondigs-sjmorges altied in heur sjtamcafé Verheggen op ut Maolbrook. Hiej sjtelt Frits zien idee aan Harrie en Wim veur, zie besjloete om ein vastelaovesvereniging op te richte.
Noe nog ein geschikte naam keeze. Der komme al drek suggesties zo-wie: Zandjhaes of Hagedisse. Harrie kump mit de Nachtegale. Dit omdet eine nachtegaal eine kleine maar feine vogel is en det pas sjoon biej Azerao omdet dit dörp auch klein maar fein is.

De eerste aovond wird gekaoze veur de bend “De Accordeonette”. Deze koste toen al ut zeer riante bedraag van 450 göjje. Es der ein tekort in de koste zou zeen zou ederein zien deil biedrage. Paul van Maen (Engelen) waerde oetgekaoze es eerste Prins van De Nachtegale. Es prinsepak fungeerde ein pak van sjötterie en fluiterkorps van ut Maolbrook. De prinsemöts waerde gesjponsord door kastelein Thei Verheggen. De pekskes veur de Raod van Ellef waerde in Leeve gekoch en de koste hie-van waerde veurgesjaote door ut fluiterkorps.
Nao de eerste aovend, dae heel good sjlaagde en wo-op versjillende gifte waerde ontvange, koste deeze al truuk waere betaald.